ЖАҢАЛЫҚТАР

Облыс әкімі Ғали Есқалиев фейсбукте жазба жариялап, Біріккен Араб Әмірліктері мен Түркиядағы елшіліктердің қолдауымен өңірде инвестициялық жобаларды жүзеге асыру бойынша өткізілген бірқатар кездесулердің қорытындысына тоқталды. «Теректі ауданындағы мұнай өңдеу зауыты жобасына инвестор болып табылатын Абу-Даби әмірлігінің шейхімен зауыт құрылысы кезінде туындаған кейбір мәселелерді талқыладық. Біз жобаны жедел түрде жүзеге асыру бойынша сұрақтарды талқылап, міндеттерді айқындадық. Инвестор жоғары өнімділігі бар мұнай өнімдерін өңдейтін және қызметкерлеріне (200-ге жуық қызметкер) еңбек ету мен демалуға ыңғайлы, жақсы жағдай жасалған заманауи зауыт салуды көздеп отыр. Сондай-ақ, шетелдік инвестормен қой етін өндіру жобасы мен араб елдеріне арналған селекциялық жұмыстар бағыты талқыланды. Жақын арада араб инвесторларының мамандар тобы біздің облысқа келетін болады. Ал Ыстамбұлда Орал арқылы әуе жүк тасымалы көлемін арттыруға, мал терісін өңдейтін зауытты қалпына келтіруге, сондай-ақ Орал қаласында салынып жатқан 4 жұлдызды қонақүйді басқаруға ниет білдірген компаниялармен кездестім. Бұл жерде инвестициядан гөрі олардың осы саладағы көпжылдық тәжірибелері маңызды. Араб және түрік кәсіпкерлері біздің елмен өте жақсы таныс. Қазақстан халқына асқан құрметпен қарайтынына көз жеткіздім. Мұны пайдалану керек. Өйткені әлем елдері инвестиция тарту үшін бар күштерін салуда. Алдағы бір-екі айда біз бұл кездесулердің алғашқы нәтижелерін көретін боламыз. Бұл кездесулер Батыс Қазақстан облысының дамуына оң серпіліс беретініне сенімдімін», делінген аймақ басшысының жазбасында.